WILLEMSTAD.- Ban Galilea a nase na aña 2010 spontaneamente durante un di nos enkuentronan den kas di Señor. For di e tempu ei mi tabata dal un pida koro di e kansion durante presentashonnan i e públiko tabata reakshoná hopi positivo. Esaki a animá mi pa traha riba e komposishon aki i ku inspirashon i yudansa di Dios Su Spiritu, esaki a bira e realidat.
Galilea ta e region na Israel kaminda Hesus i su disipelnan a pasa gran parti di nan bida. Seru di Galilea tabata nan lugá di enkuentro i einan Hesus tabata eduká i pasa tempu ku su disipelnan.
E region di Galilea tabata asina spesial pa Hesus debí ku e tabata promé lugá kaminda e disipelnan mester a topa kuné despues di su morto i resurekshon.
“ Mi ta konfia ku e komposishon aki lo bai animá i trese bèk e konfiansa pa bishitá Señor Su Kas i anhelá pa biba den Su presensia pa medio di un Relashon íntimo i no Religion. Mi ta sumamente agradesido na Kristu-Hesus pa e privilegio di por presentá i representá Su amor atraves di músika i Su palabra”, esei tabata e reakshon di Willy Rodriguez riba e produkshon nobo aki.
Den transkurso di dianan por skucha “Ban Galilea” na bo radio preferí i tambe riba medionan sosial manera Spotify - YouTube - ITunes i SoundCloud.