WILLEMSTAD.- E konosido Patrick Kicken, ántes DJ na Hulanda na emisoranan manera Radio Veronica i 3FM, a hasi un workshop ku e tim di Morning Threesome. Morning Threesome ta wòrdu presentá pa Anette Juliette, Brenton Balentien i Shari Mathilda. Patrick a enfatisá e importansia di bon preparashon, di keda bo mes i di disfrutá di e momentu ku bo oyentenan.
Un oyente ta skohe pa skucha abo i ta bo deber pa bo laga e persona sintié bon, involukrá i yamá pa bin bèk bin djòin bo bòmbòshi e siguiente dia. Pasó ya pa 2 luna tin bòmbòshi mainta na radio den e programa Morning Threesome na TCFM, kanal 93.3.
Un trio super dinámiko, ku di 7 or pa 9 or di mainta, riba tur dia di siman, ta informá bo, entretené bo i pone bo hari un poko ora bo djòin e bòmbòshi. Anette Juliette ta un konosí di radio i televishon ya pa hopi aña, bayendo bèk te na programa manera Video Zoo. Brenton tambe ta konosí, pero mas bien pa su talento di mixology riba tereno di cocktails. Shari mas ku klaro ya ta un stèmpel na TCFM pa vários aña ku su stèm ku ta kaptivá mesora.
Dave Mourillon i Renzo Petronia, konosí den e mundu di media i entretenimentu, a krea e kompania di produkshon Brand My Image Media (BMIM). BMIM a lansa Morning Threesome na TCFM na novèmber di 2019, tambe nan lo lansa na mart 2020 un otro programa Rumbera Network Curaçao kanal 107.9.
Pero pa ku Morning Threesome “Eh eh, e nòmber...” den kombersashon ku Renzo Petronia, ku ta hari i kontinuá ku “wèl, nos tabata ke un nòmber ku ta hala atenshon.  E nòmber tin su kos, pero pa nos ta e totalidat di e programa, kuminsá bo mainta manera kos ku bo por a topa bo friends un ratu i chit chat, hari, interkambiá i sigui ku bo dia den un ‘mood’ positivo”.
Pa traha programa di radio ta fásil, pero BMIM ke trata na hasié un eksperensia pa e oyente. Dave Mourillon ta añadí: “Nos ta wak muchu mas ku simplemente e disko ku lo toka; hopi tempu i dedikashon ta bai na styling di e programa. Ta e detayenan ta konta!” BMIM tin mas programa den ‘pipeline’... miéntras eseinan ta konkretisá nos ta invitá bo tambe pa djòin e bòmbòshi ku Morning Threesome.