BOSTON.- Riba e website ‘Fansided’ a aparesé un artíkulo interesante riba e pelotero arubano Xander Bogaerts relashoná ku esaki su puesto importante den Boston Red Sox. Bogaerts un tempu tabata un prospekto na kaminda, figurando bou di lidernan legendario manera David Ortiz i Dustin Pedroia. E All-Start shortstop no ta markando su puesto den historia dje ekipo komo un dje mihó shortstopnan na e posishon. Tampoko e tin e impakto dje presensia di “Big Papi” na Boston. Pero hecho ta ku silensiosamente el a surgi komo lider dje ekipo, tantu ku su bate komo den clubhouse. Su defensa tambe ta na nivel.

Komo un dje sinku All-Stars ku a representá Red Sox den MLB All-Star Game e siman aki, Bogaerts a liga 2 hit den 3 turno ku un RBI i a sobresalí riba e shortstopnan ku ta haña tur atenshon manera Fernando Tatis Jr, Carlos Correa, Francisco Lindor i Trevor Story, kende tabatin e deseo pa por tin mas oportunidat pa mira e talento di Bogaerts.

E arubano e temporada aki ta importante den e éksito di Red Sox. Ku su averahe di bateo di .321 drentando di dos parti di temporada, Bogaerts ademas a mustra su forsa na bate ku 15 homerun i 51 RBI.

Esakinan ta sifranan All-star, pero loke ta hasié un All-Star pa fanatikonan di Red Sox ta su liderazgo, su lealtat na e ekipo i su produkshon ora tin mester. Refiriendo na loyalidat, e hecho ku el a firma un ekstenshon amikal pa e ekipo den su ultimo kontrakt ta mustra su dedikashon na e ekipo.

Pa resumí, Bogaerts awor ta un strea den e liga. Tambe mester konstatá ku e ta ‘underrated’, pero tene kuenta ku tog e ta liderando un ekipo ku bon mirá no mester ta kompitiendo  entre e mihónan na momento ku a yega e All-Star break.

Ku dos renchi di World Series, i kisas riba kaminda pa unu mas, e preis di Bogaerts ta sigui subi i Red Sox mester apresiá su balor den kaso ku nan ke tené na Boston.