NEW YORK.- Aparte ku nos tin Kenley Jansen i Jonathan Schoop komo hungadónan lokal ku ta forma parti di weganan di tur strea 2017, ainda un hungadó lokal mas por keda agregá na e selekshon di liga amerikano huntu ku Schoop.

E shortstopnan Didi Gregorius di New York Yankees i Xander Bogaerts di Boston Red Sox, por forma parti di e selekshon di liga amerikano ya ku nan ta forma parti den e votashon final. Esaki ta e proseso ku MLB ta skohe sinku hungadó ku no a keda selekshoná pero tin bon temporada i entre e hungadónan aki fanátikonan tin ku vota pa un di nan bira e último hungadó ku lo keda agregá na e selekshon di liga amerikano den e kaso aki.

Bogaerts un biaha mas tin un tremendo temporada batiendo pa un averahe di .314 ku 5 honron i 39 kareda empuhá huntu ku nuebe base robá miéntras Gregorius a mehora ofensivamente ta batiendo pa un averahe .310 ku 10 honron i 36 kareda empuhá.

Pa Gregorius esaki mester ta un logro p’e teniendo na kuenta ku el a pèrdè e promé luna ku leshon na su skouder i pa yega asina len den votashon final ta algu realmente tremendo. Mundu Deportivo ta deseá ámbos éksito den e parti final di votashon aki i ta spera ku un di nan lo kai den e selekshon pero ku e kurason ta pidi pa e yu di Kòrsou, Didi Gregorius, keda skohé.