WILLEMSTAD.- E aña aki nos ta orguyoso di presentá nos di dos lustro di shou, yamá  Yaadein – Rekuerdo.
E éksito di e último 9 añanan no ta solamente pa motibu di e bailenan espektakular, pero tambe danki na e públiko diverso ku a bin disfrutá i ku a enamorá di e diferente estilonan di baile: ‘Bollywood fusion’ mesklá ku un sabor lokal.
E shou di e aña aki, ku ta e di 10 shou, un biaha mas lo ofresé presentashonnan emoshonante di artistanan manera Circo Magik, Crisèn Schorea i studiantenan lokal di baile Hindú ku ta varia entre 5 pa 50 aña di edat.
E artistanan indudablemente lo impreshoná i fasiná bo ku nan presentashon i laga bo ku gana di 10 aña mas di shou!
Ku plaser nos ta invitá bo pa asistí na e shou yen di sorpresa aki, dia 13 di aprel próksimo den ouditorio di World Trade Center pa 4 or di atardi i 8 or di anochi.
Karchi ta optenibel pa 30 florin na Mensing’s Caminada òf na Fina Dance Art School.