WILLEMSTAD.- Despues di dos siman i mei di trabou intensivo e superfisie nobo di Stadion Ergilio Hato a keda instalá i sertifiká pa FIFA.

...Vergilly Winklar ku e sertifikashon di FIFA ...

Direktor di FDDK Vergilly Winklar ta hopi kontentu i orguyoso ku e proyekto aki, mirando ku pa FDDK esaki ta un logro signifikante den nos esfuerso pa subi e kalidat di e fasilidatnan di deporte na Kòrsou miéntras Minister Sithree van Heydoorn a indiká di ta hopi satisfecho ku a logra keda kla ku e instalashon di yerba nobo na stadion Ergilio Hato, esaki ta reflehá nos kompromiso pa un infrastruktura di deporte di kalidat haltu i ku e importansia pa por duna deportistanan di Kòrsou e fasilidat di un mihó kalidat.
Vergilly Winklar a splika ku e eksperensia di GCC Sport Surfaces, for di London, i ku e tim tékniko lokal, a logra transformá e tereno di wega di Stadion Ergilio Hato den un tereno di kalidat haltu.

...Bista kon e superfisie a keda na Stadion Ergilio Hato...

Direktor di Curaçao Wegenbouw Pierre Montesant tambe a bisa di ta orguyoso di por a kontribuí den e bunita proyekto aki.
Lo tin un garantia riba e superfisie di ocho aña, miéntras e sertifikashon di FIFA lo ta pa tres aña.
Miéntras mañan lo pasa un man mas na kaminda mester marka e vèlt, esaki mirando ku e komponente ta yega awe for di Oropa. Tur kos lo ta kla pa weganan di djabièrnè awor.