MERKA.- For di djárason último Yoko Ono a keda añadí ofisialmente komo un dje kompositornan dje éksito mundial ‘Imagine’. Yoko a skibi e kansion huntu ku su pareha, e defuntu, John Lennon.
Durante tur e añanan e komposishon tabata riba nòmber dje eks kantante di ‘The Beatles’. E portal ‘Entertainment Weekly’ a publiká djárason último imágennan for di dékada 70 kaminda Lennon ta bisa ku el a komponé e piesa huntu ku Ono.
‘E kredensialnan mester tabata Lennon-Ono, esaki debí ku e konsepto i parti dje teksto ta di Yoko, pero e tempu ei mi tabata muchu egoista i macho”, asina Lennon a deklará na 1971.
Despues di 48 aña ku e kansion a keda publiká, awor Ono ta aparesé tòg komo un dje outornan. Segun e yu, Sean Lennon su mama tabata bastante emoshoná na momentu ku el a keda informá. “Ku pasenshi bo ta gana gloria”.