WILLEMSTAD.- Despues ku na 2018 nan a lansa nan EP (Extended Play) titulá ‘Sraella’, e grupo a sigui den bon vibrashon i a sigui traha tambe na otro produkshonnan. Denzel, Xuz, Bjorne i Trends a keda premiá resientemente komo ‘urban group’ di aña pa Premio Karabela.
E kas di produkshon Decoded ta sumamente kontentu ku tur 3 premio ku nan a risibí e aña aki i ta mira esaki komo un paréntesis ku ta koroná trabou duru i dedikashon. “Nos ta felisitá tur nos artistanan, Yentje Silvanie komo ‘Female Singer Of The Year’, Jaido pa ‘Rapper Of The Year’ i DXBT pa ‘Urban Group Of The Year.
Kada un riba nan mes a sobresalí den nan género i serka nan fanátikonan i nos ta kontentu di mira ku Premio Karabela ta ofresé un plataforma pa esaki”, esaki di akuerdo ku representante di Decoded, Efrem Mambi.
DXBT, ta alkansá 100,000 views riba YouTube ku ‘Yora Só’, un ‘trap’ produsí pa TuneParagon i Pastor ku ta konta un storia di e bida real di Bjorne. Na infansia, Bjorne, awor kantante di DXBT tabata tin bastante difikultat ku su salú.
‘Yora Só’ ta netamente un piesa pa kualke hóben ku ta pasando dor di tipo di difikultatnan asina pa no entregá, pero sigui lucha. Por solisitá ‘Yora Só’ na bo radio faborito.
Hóbennan por sigui Denzel, Bjorne i Xuz- DXBT- riba Instagram i Facebook DXBT / DecodedOfficial. Tambe por stream riba iTunes/ Spotify/ Google Play/ Apple Music. Sigui artistanan di Decoded i suskribí na YouTube Channel:  Decoded.