WILLEMSTAD.- E video mas mirá den historia di YouTube tin mas ku 5 mil mion di ‘views’ ta ‘Despacito’.
E kanal Vevo a logra di rekuperá ayera, djamars, e video ‘Despacito’, den bos di e portorikeñonan, Luis Fonsi i Daddy Yankee, despues ku esaki a keda eliminá for di e plataforma oudiovisual di YouTube.
Apart di e video mas mirá den historia di YouTube, videonan di Shakira, Selena Gomez, Drake i Taylor Swift tambe a keda afektá.
E ‘thumbnail’ di Despacito a keda kambiá pa un potrèt for di un serie di televishon. Prosox, un dje supuesto outornan di e ‘hack’, a splika via Twitter ku el a hasi esaki pa divershon i solamente a kambia e script di e título riba YouTube, segun un reportahe di BBC News. ‘No husgá mi, mi stima YouTube’, asina Prosox a indiká.