QUEBEC.- Tin un nòmber na Quebec, Canada, ku kua hopi scout ta teniendo kuenta. E hóben Joshua Jones ku su talentonan ta kaptando diferente scout na e pais. Ta un nòmber ku na Kòrsou nos tambe mester kuminsá tene kuenta kuné pasó su tata ta Andruw Jones.

Joshua, di 14 aña di edat, a konektá 30 honron i bati pa un averahe di .700 i sali hungadó di aña pa e provinsia di Quebec. Otro aña lo e hunga pa un akademia di beisbòl di Canada serka coach Rob Fatal.

Joshua ta hungando aktualmente den e di seis torneo anual Tournament 12 ku ta hunga na e stadion di Toronto Blue Jays kual ta Rogers Centre. E hóben a indiká ku e ta den kontakto ku su tata i sa manda filmashon di su turnonan na bate i Andruw di su banda ta dun’é konseho kiko e tin ku hasi.

Joshua ta spera ku e por haña e atenshon nesesario ku e por wòrdu di draft denter di algun aña, ku e meta  pa e por tin un karera den Liga Grandi den futuro.