BARCELONA.- E yu di Kòrsou Danny Makkelie, ku ta flùit wega di Eredivisie na Ulanda, ayera a dirigí e wega di Champions League entre Barcelona i Roma ku a tuma lugá den Camp Nou.  Danny a nanse na Kòrsou riba 28 yanüari 1983.

Makkelie ta rèfri internashonal di FIFA for di 2011, siendo ku e ta un di e rèfrinan mas hóben den e kompetensia, ku solamente 35 aña di edat. Ademas di esaki Makkelie ta miembro di kuerpo polisial di Ulanda.

Di un banda ta hopi kurioso tòg ku e rèfri yu di Kòrsou, no ta entre esnan eligí pa flùit weganan den e próksimo mundial di Rusia 2018.

Promé ku ayera na ningun okashon Makkelie a yega di flùit wega di Barça, ounke den e buèlta anterior di Champions League, el a dirigi wega ku a bai entre ManUnited i Sevilla, den kua e spañónan a gana 2-1.