WASHINGTON, USA (AFP).- E diesdos huradonan dje proseso kontra di Hunter Biden pa poseshon ilegal di un arma di kandela den 2018 a hañ’é kulpabel di tres delito, den un fayo históriko kontra dje promé yu di un presidente di Merka na momento ku esaki ta den funshon.
Hunter, yu di 54 aña di presidente Joe Biden, a keda deklará kulpabel di tres akusashon den un tribunal di su siudat natal Wilmington (Delaware); dos pa a gaña por eskrito pa atkerí e arma, un revòlver kaliber 38, i unu mas pa posishon ilegal despues dje kompra.
Hunter Biden a bandoná e sede di tribunal ku un sonrisa riba su kara, ku na man e promé dama Bill Biden (su madrasa) i tambe su kasá Melissa Cohen Bide. Joe Biden, di 81 aña, a bisa di ta “respetá e proseso hudisial” i a ekspresá “amor i apoyo” na su yu.
“Mi ta presidente, pero tambe mi ta tata”, segun el a bisa den un komunikado emití pa White House. E mandatario a biaha ayera mes pa Wilmington.
E veredikto a yega na momento ku Biden ta buska su reelekshon i ménos di dos siman despues dje sentensia di kulpabilidat kontra di Donald Trump, akusá di froude empresarial.
Ounke ku Biden ta enfrentá un kastigu di te asta 25 aña di prisòn, ta spera un kastigu mas leve inkluso sin bai prisòn pa motibu ku e no tin antesedente kriminal.
