Tin un fortuna di 49.2 mion dollar pa parti

BUENOS AIRES.- Ku morto di Diego Maradona, pelea a start relashoná ku partimentu di herensia. Pero miéntras ku e yunan konosí a kuminsá diskutí kon pa kòrta e bolo, ta resultá ku mas yu ta surgiendo un tras di otro. Te ku ayera e kantidat di yu a bira 11 - for di shete diferente mama - i e diskushon ta bira kon pa repartí e fortuna di alrededor di US$ 49.2 mion ku e strea argentino a bai laga.

Maradona a muri di un atake di kurason dia 25 di novèmber último na edat di 60 aña. E no a laga un tèstamènt, ku konsekuensia ku por spera un bataya legal ku lo dura vários luna i kisas te hasta algun aña.

Diego Maradona Jr.

Na un prinsipio a bisa ku Maradona tin 5 yu i esakinan na Buenos Aires a dal e promé pasonan legal pa haña un bon pida dje “bolo”. Pero, miéntras tantu, a surgi shete yu mas i esei no ta tur kos. Kuater di e 5 rumannan muhé dje futbolista argentino tambe a disidí ku nan lo buska nan parti, una bes ku a bira konosí ku no tin tèstamènt.

Un fuente na Buenos Aires ya a hasi un remarke hopi interesante: “E pelea pa e sèn di Maradona lo bira un kombate pa Kopa Mundial”.

Papelnan di Korte a revelá ku Maradona a muri laga sèn kèsh na Suiza, Dubai i Buenos Aires, ademas di propiedat rònt mundu i un flota di vehíkulonan luhoso. Su kuentanan bankario ademas ta indiká ku regularmente e ta risibí entrada for di kontraktnan ku multinationals grandi manera Puma i Coca Cola.

Maradona huntu ku Giannina i Dalma.

Maradona na aña 2012 a traha tèstamènt, pero kuater aña despues a anulá esaki. Lei argentino ta prohibí ku por desheredá un yu i ta eksigí ku kada yu mester risibí parti igual. Un fuente a duna di konosé ku e echo ku no tin tèstamènt, yunan yegá na Maradona komo tambe otronan ku nunka e no a topa lo por eksigí un parti igual for di su fortuna, pareu na loke e yunan rekonosé lo haña. Esaki, sin embargo, ta inaseptabel serka e yunan ku semper a forma parti di su bida.

Promé ku su morto, Maradona a rekonosé ku e ta tata di ocho yu. Pero ora ku a yega momento pa atendé asuntunan manera tata lo hasi, e asuntu tabata pega. Esei no ta nada straño si tene kuenta ku Maradona durante di hopi aña a insistí ku e tin solamente dos yu, Giannina i Dalma, ku ta su yunan legitimo ku su eks-kasá Claudia Villaface. Pero ta resultá ku Maradona su promé yu ta Diego Sinagra, nasé den sèptèmber 1986, ku ta algun luna promé ku Dalma a nase.

Jana, di profeshon modelo kende resien a keda rekonosé pa Maradona.

Sinagra, ku awor ta konosí komo Diego Armando Maradona Junior, a keda lantá pa su mama Cristian Sinagra na Italia. E ta futbolista di profeshon.

Miéntras ku korte italiano na aña 1993 a diktaminá ku Sinagra ta yu di Maradona, a tarda te 2010 pa e argentino a rekonosé esei. Inkluso el a nenga na hasi test di DNA.

Mas o ménos e mesun tempu, Maradona a rekonosé ku e tin un yu ku yama Jana, yu muhé ku a nase for di su relashon ku Valeria Sabalain. Maradona finalmente a rekonosé solamente Diego Junior i Jana komo su yunan despues di batayanan hopi largu den korte ku e respektivo mamanan.

No tabatin ‘issue’ di paternidat relashoná ku e yu Diego Fernando, tresé na mundu den 2013 pa Maradona su eks-frei Veronica Ojeda.

Maradona no tin yu ku su partner di mas resien Rocio Oliva, pero el a rekonosé ku e tin tres yu kendenan a nase na Cuba den 2019. E tres yunan –Joana, Lu i Javielito- a nase serka dos diferente mama durante e tempu ku e futbolista tabata na Cuba pa su tratamentu kontra adikshon entre 2000 i 2005.

Diego Jr., kende a haña e fam Maradona den korte na Italia den 1995. Tabata te den 2016 ku Maradona mes a rekonosé komo yu.

E yu muhé Gianinna na un okashon a hasi un ‘joke’ relashoná ku su tata ora ku el a bisa ku esaki kasi a produsí sufisiente pa e forma un team di futbòl. “E falta tres mas so pa yega 11”, el a bisa, agregando: “Bo por!”.

Den añanan resien dos persona mas a reklamá ku nan ta yu di Maradona. Ta trata di Santiago Lara i Magli Gil. Tur dos den dianan tras di lomba a tuma akshon legal pa determiná un ke otro.

Djis despues di morto di Maradona, abogado di Lara a pidi korte pa ekshumá e kurpa dje eks-futbolista pa hasi test di DNA ku e meta pa haña prueba ku e ta yu dje astro argentino.

Magali Gil tambe ta ‘claim’ di ta yu.