WASHINGTON, USA (AFP).- E presidente ukraniano Volodimir Zelenski a akusá Donald Trump di ”posishoná su mes na fabor di” e mandatario ruso Vladimir Putin i a atvertí ku mirónes di persona por muri sin e yudansa norteamerikano nobo na Kiev.
E lider ukraniano a duna un entrevista ku CNN na momento ku e presidente merikano Joe Biden ta purba pa republikanonan di Kámara di Representantenan outorisá e montante di 61.000 mion dòler adishonal pa Ukrania.
Segun fragmentonan dje entrevista publiká ayera, Zelenski a bisa di “no por komprondé kon Donald Trump por ta na fabor di Putin”, i a kalifiká esaki komo ”inkreibel”. Zelenski mas aleu a bisa di no ta kere ku Trump ta komprondé Putin despues di a reuní ku esaki durante di su mandato.
“Mi ta kere ku Donald Trump no konosé Putin”, segun Zelenski. “Mi ta kere ku e no ta komprondé ku Putin nunka lo stòp” .
Trump a kalifiká un posibel yudansa finansiero komo “gastamentu di sèn” i a trata na relashoná e debate riba Ukrania ku un refuerso di e polítika migratorio pa frena e entrada di migrantenan via frontera ku Mexico.
J.D. Vance, un senador republikano ku ta simpatisá ku Trump, a bisa e luna’ki den un konferensia di seguridat di Munich ku e yudansa norteamerikano “lo no kambia di forma fundamental e realidat den e kampo di pelea”.
Zelenski a invitá Vance pa bishitá e linia dje frente: “Lo bo komprondé ku miónes di hende lo keda asesiná” sin un yudansa merikano nobo.
Resientemente Rusia a poderá dje siudat di Avdiivka, den e region ost di Donetsk, e tropanan ukraniano a duna di konosé ku nan a haña nan mes obligá pa spar riba munishon debí na e skarsedat.
