HULANDA.- Rotterdam Unlimeted, RU, e organisashon ku ta enkargá pa organisá Karnaval di Rotterdam a informá ku nan tambe a keda konfrontá ku e pandemia i ku nan ta trahando pa mas tantu posibel trata pa logra ku un parti dje eventonan di ‘Rotterdam Unlimited’ por tuma lugá, entre nan e parada di Zomercarnaval, siguí pa algun presentashon musikal.

E intenshon ta ku lo organisá algun dje aktividatnan di Rotterdam Ahoy kaminda ta posibel pa kontrolá e públiko ku nan prueba di vakuna i traha ku tèstnan rápido.

Un evento públiko den henter sentro di siudat, loke Rotterdam Unlimited ta, por tuma lugá solamente si e pandemia ta bou di kontròl i pa esaki ta ser spera ku e lo por ta un realidat den ‘zomer’ di 2021, asina e direktor di e festival, Guus Dutrieux a indiká den un komunikado dje organisashon.

Pa hasi e kambio pa Rotterdam Ahoy un realidat lo kobra pa entrada. Ku e desishon aki e organisashon ta spera ku un gran parti dje aktividatnan dje evento lo por tuma lugá, naturalmente e konsepto mester kuadra ku e reglanan di Gobièrnu.

E programa di dia 31 di yüli den Rotterdam Ahoy lo tuma lugá despues ku algun dje eventonan dje programa tuma lugá den otro lokalidatnan na Rotterdam, entre otro na de Doelen i Theater Zuidplein. Preisnan di entrada i e programa lo bira konosí mas despues.