WILLEMSTAD.- For di chikí nos a lanta ta tende tumba i bai wak karnaval! Ta lógiko ku awor ku nos ta grandi nos ke pa nos yunan tambe eksperensiá esaki i engrandesé karnaval di Kòrsou lokal i internashonal ku tantu ‘Zoyito’ (hubenil) i ‘Zoy’é’.
E nesesidat aki a biba den miembronan di direktiva Sigurd de Wind (presidente), Varouska Martins Pereira -Faries (sekretaria), Aziza de Freitas (tesorero) i Ashanti Schenker. Huntu nan a lanta Zoy’é i awe ta presentá nan trahenan di Zoy’é pa 2019.
Zoy’é lo partisipá ku un máksimo di 250 partisipante, esaki ta pa garantisá un eksperensia inolvidabel i di tin un grupo ku por manehá riba tur tereno i tambe pa reflehá bèk ku ta un famia grandi nos ta, ku via via tur hende konosé otro, pasó esaki ta karnaval, kaminda ku un temporada di aña nos ta topa otro bèk, papia nos ko’i kènsnan na sede, baila i gosa ku otro.
Zoy’é lo partisipá ku su “house band” Zoy’é Band ku ta wòrdu dirigí pa e konosido Marlon “Lonte” Conradus ku músikonan profeshonal. Zoy’é Band lo tin un frònt di banda pa kita sombré ku Richi Rich, Roela Goilo, Ritzel Godfried, Ataniro….i ta den fase final ku Ishair “Icho” Monte i tambe Irvin “Luwi” Jano ta den tapara!.
Pa inskripshon i mas informashon, bishitá e wèpsait, www.zoyecuracao.com . Pa mas informashon, por tuma kontakto via di WhatsApp +5999 5217275.