WILLEMSTAD.- Gobièrnu a kalkulá ku e tin komo 1.8 mion florin riba kaya na plakanan ku tin di paga pa pèrmit di konstrukshon. Hopi ta esnan ku ta hasi petishon pa pèrmit pa konstrukshon, pero na momentu ku esaki ta kla nan no ta akudí pa paga sobrá sèn asumiendo ku nan tin un pèrmit, aunke esei no ta bèrdat. Pero gobièrnu ta bai tin un ehersisio, un plan ku ta bai den ehekushon pronto pa por kobra e plakanan ku tin riba kaya.

Pa fasilitá e proseso di dunamentu di pèrmit di konstrukshon, gobièrnu a disidí ku lo pone/publiká pèrmitnan ku ta kla riba su página wèp pa asina kada ken sa na momentu ku nan pèrmit ta kla. Esei ta algu komo parti dje maneho ku gobièrnu ta hibando pa hasi ku pèrmitnan ta sali mas lihé tambe. Asina Minister di Tráfiko, Transporte i Planifikashon Urbano, sra. Zita Jesus-Leito, a duna di konosé den un enkuentro ku prensa e siman aki. T’asina ku hopi hende ta entregá nan petishon pa pèrmit di konstrukshon, pero no sa ki momentu esaki ta keda kla.

Tin otronan ku na momentu di entrega dje petishon ta duna e dokumentonan korespondiente, pero despues ROP ta bin ripará ku ta falta dokumento i e persona(nan) ei no ta trese e loke ku falta. Esei ta trese retraso den atendementu dje pèrmit.

Si hasi un konteo di fo’i aña 2011 te ku awor tin un kantidat di 1.670 pèrmit ku no a ser tumá, siendo ku nan ta kla kaba, i e kantidat di pèrmit sin destinashon aki ta representá 1.8 mion ku no a drenta den kaha di gobièrnu.

Un dje puntonan prinsipal ku e gobièrnu aki tin den su maneho ta  e parti di publikashon di pèrmit di konstrukshon. E tin di rekonosé ku hopi hende ta reklamá ku nan no ta haña kontesta pa sa si nan pèrmit ta kla. E tin di rekonosé tambe ku mester tin transparensia i ku e pèrmitnan ta bin kla na tempu. Pero pa ser transparente mes a kuminsá publiká e pèrmitnan di konstrukshon riba su página wèp. Ke evitá ku ta bini reklamo, i awor e kliente mes por sigui un ke otro. Na momentu ku un pèrmit ta kla e lo ser publiká ku su direkshon. Pa motibunan di privasidat lo no pone nòmber dje kliente. Por busk’é riba https://vvrp.cw/permit/