WILLEMSTAD.-E titular di finansa i alabes Salubridat Javier Silvania a manda un karta pa direktor di Banko di Seguro Sosial SVB, Phillip Martis den kua ta informa e direktor ku konforme desishon di Konseho di Minister fechá 29 mart 2023 ministerio di finansa a hasi traspaso di 1.8 mion florin pa SVB . E montante aki ta pa SVB por kobra e pago na dòkternan di kas, esta 1 florin pa kada pashènt inskribí pa luna den 2023.

Minister Silvania ta kuminsá na informa e direktor di SVB ku tin un desishon di Konseho di Minister di 2 mart 2011 2011/10760 (red. 12 aña pasá) den kua a bai di akuerdo pa bini ku un pòst pa dòkternan di kas, e asina yama HAP. For di 2011 gobièrnu a rekonose e lantamentu di e HAP. E desishon aki ta impliká ku ta reforsá e promé liña di kuido; ta subi e aksesibilidat i kalidat na kuido, ta krea uniformidat dentro di e promé liña di kuido i mester bini ku un kampaña di informashon efektivo dirigí riba komunidat.

Entretantu un grupo di trabou a keda instituí ku ta konsistí di e asosiashon di dòkternan di kas(CHV), SVB, CMC i ministerio di GMN. E meta ta pa hasi e HAP operashonal no mas tardá 1 yanüari 2024.

Manera indiká ariba, ya kaba, for di dia 20 di aprel último a hasi traspaso di 1.8 mion pa SVB pa kumpli ku e enkargo ya menshoná.

Mesora ta hala atenshon di SVB pa korda pa responsabilisá e 1.8 mion aki na yüli 2023 i tambe na na final ku ta yanüari 2024 pa duna spesifikashon na Finansa kiko a paga.