WILLEMSTAD.- Den luna di Desèmber aki, un kantidat rèkòrt di 1518 persona su nòmber ta riba ròl, pa butnan habrí. Tur por presentá awe dilanti hues pa asumí nan responsabilidat. Lastu tempunan hopi outomobilista no ta presentá dilanti hues pa nan kaso. Hopi di e outomobilistanan, no a tene e fecha na kuenta ku nan mester a presentá den korte, òf ta bai ofisina di Paga bo but mes i kanselá e loke ku nan tin habrí. Meskos ku aña pasá, OM ta yegando e montante di un mion florin na butnan ku tin habrí. Aña pasá nan a surpasá e montante aki i tur kos ta indiká ku e aña aki tambe lo ta e kaso.

Mirando ku den luna di desèmber hopi persona ta biaha pa bai den eksterior pa pasa dianan di fiesta, OM a pone èkstra kontròl na Hato, pa tur esnan ku tin but habrí, paga esaki promé ku nan biaha.

Pa fasilitá e outomobilistanan aki, den luna di desèmber ofisina di Paga bo But lo

ta habrí djaweps awor dia 2 di desèmber di 7.30 or te 11.30 or di mainta, i di 1.30 or di mèrdia di 8 or di anochi. Djasabra 4 di desèmber ofisina lo ta habrí di 8 or pa 12 or di mèrdia. Paga bo but pa bo biaha trankil.

Awe Korte lo trata e ‘verkeerszitting’ mensual, den kual esnan ku a haña but den e último lunanan ta haña oportunidat pa defendé nan kaso, si e shofùr no ta di akuerdo ku e but ku el a risibí. Si e outomobilista no a paga su but promé ku ayera (14 di desèmber) e ta kore riesgo ku den Korte, e montante di but ta subi. Ultimamente polis durante kontròl di tráfiko a gará hopi menor di edat ta kore outo sin reibeweis.

Mayoria di nan a keda gará 2 pa 3 bia tras di stür. Den e kaso aki hopi di e menornan, no ta presentá i  fiskal ta hasi demanda di kastigunan di prizòn, si bolbe haña nan ta kore outo sin reibeweis.  Segun fiskal, esaki pa motibu ku e kastigu di but no ta yuda mas i p’esei mester bai na e kastigu máksimo ku ta kastigu di prizòn ku por ta 2 òf 4 siman.

Pa loke ta trata e outomobilistanan ku ta haña  but pa kore outo sin seguro, den vários di e kasonan, mayoria ta bisa di a pèrdè trabou i no por paga seguro.

Nan a bisa ku nan tin yu pa kria i ta preferá kore riesgo di kore e outo sin seguro.

Ministerio Públiko ta keda bin ku hopi kampaña atraktivo i oportunidat pa yuda e outomobilistanan paga nan but i evitá ku nan ta kai den mas problema.