WILLEMSTAD.- E lei pa prohibí humamentu den lugá públiko será (Landsverordening van de 7de september 2015 tot wijziging van de Landsverordening beperking tabaksgebruik) a kumpli 10 aña. “Mi a bin ku e lei di inisiativa aki komo solushon pa tur hende ku ta skohe pa kuida nan salú, pero obligatoriamente mester guli huma di esnan ku ta huma. Prinsipalmente trahadónan di establesimentunan di horeca i kasino a haña un alivio”, segun eks polítiko Alex Rosaria.

No tin duda, basá riba tur e komentarionan ku sr Rosaria a risibí, ku e lei tabata nesesario. Den komienso sinembargo tabatin algun resistensia manera un señora ku a rekonosé sr Rosaria i a bisa: “Mener, bo sa kuantu stress mi ta haña ora mi ta hunga mashin den kasino? Ántes mi por a huma pa kita tenshon, pero ku bo lei, mi tin ku bai te pafó.”

Ainda sinembargo tin lugánan Hulandes Oropeo, ku ta kibra flagrantemente ku nos lei. Mester di mas kòntròl. Esaki no ta un tarea tambe di MEO?

A trata e lei den febrüari i den kuadro di selebrashon di Dia di Idioma Materno, a disidí, riba gastu di frakshon di PAIS, pa laga tradusí e lei na Papiamentu. Kontrali na loke un èks Parlamentario, Griffie i korantnan a hisa buta den publisidat, e promé lei tradusí na Papiamentu tabata esaki, Alex Rosaria a bisa.

Tin dos inisiativa mas di lei importante: obligashon pa pone ku humamentu ta malu i asta mortal riba paki di produktonan di tabako i tambe pa prohibí benta di produktonan di tabako na menornan di edat.

Apesar ku sr Rosaria a informá un lider di frakshon den Staten di esakinan na mas ku un okashon, no tin interes.

E reto grandi ku el a menshoná 10 aña pasá, ta ‘vaping’. Vaping no por a keda reglá den e lei anti-tabako, pasombra téknikamente e no ta tabako. Vaping ta introdusí nikotina i míles di kímika den kurpa di hende. Vaping segun estudionan internashonal ta adiktivo. Hóbennan di 11-12 i asta ménos, ta vape pa bai dilanti. Drenta den lugánan di fast food i opservá.

Hopi pais na Asia manera Singapore, Thailand i Laos, a prohibí importashon, distribushon, benta, kompra i uso di aparatonan di vaping. Otronan tin regulashon estrikto.

Ban tuma akshon, sr Rosaria ta terminá.