E no ta mira gravedat den su echonan

WILLEMSTAD.- Korte di promé instansia ayera a kondená Janiero Kopra(26) na 10 aña di kastigu.

Kopra ta keda akusá pa 5 atrako armá den tokonan chines.

Kopra a bisa di a kometé e atrakonan pa nesesidat i desesperashon. Segun e akusado el a buska trabou tur kaminda sin por keda kla. E no tabatin koriente, kuminda ni nada pa por duna su pareha i su 2 yunan.

E ta keda akusá di a tira atrako dia 14 di yüni aña pasá na Schonegevelstraat, riba un dama ku tabata kanando. E tabata den outo ku su ko akusado femenino  Jhus- Nhaylis Calorina (23) ku tambe ta sera. Calorina tabata shofùr di e vehíkulo.

Kopra a baha fo’i outo i bou di menasa di un pipa, el a ranka tas i telefòn di e dama bai kuné. Den e tas tabatin solamente 10 florin.

Dia 21 ougùstùs aña pasá el a tira otro atrako, e bia aki na Steenrijk Minimarket. El a  kore drenta  den e toko kara tapá i bou di menasa di arma kandela, a bai ku alkohòl, 1500 florin i slòfnan di sigaria.

Tambe e ta keda akusá di a tira atrako na Sunny Side Minimarket, kaminda el a bai ku slòfnan di sigaria, karchinan di telefòn na balor di 300 florin, 1000 florin kèsh, papelnan di vlui i algun sigaria lòs. El usa violensia i a menasá e chines ku arma di kandela.

Dia 7 sèptèmber aña pasá tambe e ta keda akusá di a kometé otro atrako. E bia aki el a bai un toko na FD Rooseveltwèg.

El a kore drenta kara tapá i bou di menasa di arma di kandela a logra bai ku 1.850 florin i vários bòter di alkohòl.

Por último e ta keda akusá pa poseshon di arma di kandela den e periodo di 6 te ku  7 sèptèmber aña pasá.

Pa loke ta trata e atrako na Steenrijk minimarket, nan a bai ku vários bòter di alkohòl.  Un di e bòternan di wiski ku a keda tras, tabatin rastronan di dede ku a resultá di tabata di e akusado.

Na polis, Kopra a bisa ku el a bai pa kumpra e bòter serka e chines, pero ora el a wak e preis el a dun’é bèk. P’esei rastronan di su dede lo a keda riba e bòter. Tur e chinesnan a rekonosé Kopra riba imágennan di kámara aunke e tabatin kara tapá.

Despues di e atrako na Toko Rooseveltwèg,  polisnan a skucha telefòn di Kopra i a tend’é bisa ku mester skonde e outo ku nan a kaba di tira atrako. Polis a tene un entrada hudisial na su kas i a haña vários karchi di telefòn ku ta kuadra ku e seri di numbernan ku a keda hòrtá.

Tambe nan a haña kahanan di sigá, alkohòl i otro kosnan ku lo a keda hòrtá.

El a bisa di tabatin 1 pa dos aña ku e arma. Segun Kopra el a hañ’é riba kaya. E tabatin e wardá un kaminda, pero a tir’é afó, pasó despues di e susesonan el a realisá kiko el a hasi.

Hues den su veredikto a bisa ku e ta haña e akusashonnan probá a a base di pruebanan i tambe 2 atrako ku el a atmití. Hues a tene na kuenta ku Kopra a laga vários víktima den trouma mirando ku tur atrako e ta kometé ku arma i violensia. Tambe korte a tene kuenta ku e akusado ta ninga e gravedat di su echonan. Pa su motibu un di e denunsiantenan a sera su negoshi. Hues di opinion ku e akusado no a tuma responsabilidat pa su aktonan. Mirando tur esakinan hues a yega na e kondena di 10 aña kastigu mas 3195 mil florin na daño perhuisio.