Medida di ‘toque de queda’ den tapara

WILLEMSTAD.-Informashon ofisial di direktorado di informashon di gobièrnu ta informá ku e kantidat di kasonan di Corona vírus a subi awe djaluna 7 di sèptèmber ku 10 kaso nobo. Nuebe di e 10 kasonan nobo ta liga na kasonan eksistente. A yega na e konklushon aki a base di ‘contact tracing’ ku e tin di epidemiologia a realisá. A keda un kaso di kua su fuente no ta konosí ainda.

Ta bon pa informá tambe ku tin un kaso ku a rekuperá. E kantidat di kasonan te ku awor ta 102 hende ku a tèst positivo di kua 55 ta aktivo i 46 ku a rekuperá.

E rekomendashon di dr. Gerstenbluth i su tim kompletu na komunidat ta pa tur hende yuda kuida otro. Por a tuma nota kaba kon hóbennan ta bai fiesta i otro ambientenan pero ta bai kas i infektá nan mayornan i tambe wela i otro personanan di edat. Pa tal motibu e rekomendashon pa evitá aglomerashon. Den wikènt tras di lomba polis mester a bai algun sitio atrobe unda hendenan no tabata tene kuenta ku distansia sosial ni otro reglanan.

Ya kaba premier Rhuggenaath a duna di konosé ku a prepará kaba pa tuma medida di ‘toque de queda’ próksimamente. Ta dependé di komportashon di hendenan den komunidat si mester bini ku medidanan mas severo.