Akshon konkreto tras di medida di emergensia

WILLEMSTAD.- Banko Sentral di Kòrsou i St. Maarten a implementá medida di emergensia riba e grupo Ennia ku e meta pa restrukturá e kompania i sali na interes di tur stakeholder. Banko Sentral  pidi korte pa amplia su outoridat pa medio di e medida di emergensia, pa kubri EC Holding tambe i korte a bai di akuerdo ku esaki. Ku e paso aki Banko Sentral su posishon pa traha na restrukturashon di Ennia a keda fortifiká.

Banko Sentral ta enfatisá loke e direktor finansiero ekonómiko interino, dr. Jose Jardim a deklará durante di e konferensia di prensa esta ku lo pèrkurá pa e proseso di restrukturashon kana lihé. Entretantu ta asina ku e suma di 100 mion dòler ku a saka na komienso di e siman aki for di Ennia a bai bèk den e kompania. Ta bon pa enfatisá ku e 100 mion dòler aki ta hustamente e gota ku a pasa ariña, pues esei tabata motibu prinsipal ku Banko Sentral a tuma e desishon pa bai korte i pidi pa dekretá medida di emergensia riba Ennia.

Anteriormente sr. Jardim a bisa ku niun asegurado di Ennia no mester tin niun preokupashon pasobra Banko Sentral tei pa kuida ku e kompanianan aki ta funshoná bon i asina e klientenan por ta trankil di nan invershon.