WILLEMSTAD.- Ministerio Públiko ayera a hasi demanda di 100 ora di trabou pa e akusado femenino S. Walle (21) pa kaso di aksidente ku morto ku e ta keda akusá di dje.
Den korte di promé instansia Walle a keda kondená na 60 ora di trabou pa komunidat, mas 6 luna sin reibeweis. Tantu Ministerio Públiko komo e defensa di Walle a apelá e sentensia.
Ta trata di un kaso ku a tuma lugá dia 22 di yanüari 2019 riba Andres Belloweg krusada /Pater Poeiszstraat kaminda e víktima Leonel Shurnel Elias, nasé na Hulanda dia 14 febrüari 1991 a pèrdè su bida.
Den e veredikto di korte di promé instansia, hues a duna di konosé ku korte no ta haña ku tin pruebanan pa kulpa e akusado komo esun ku a kousa morto di e víktima.
Hues a splika ku riba e dia en kuestion e akusado tabata den su vehíkulo, el a para e pikòp mei mei di kaminda na e krusada, ku e intenshon pa e sigui kore, pero a surgi un choke inevitabel.
Segun e veredikto, konforme e deklarashon ku e akusado a duna, el a para na e krusada pa shofùr di e promé bròmer pasa.
El a splika ku e no a mira e lusnan di e promé ni e di dos bròmer.
Pero el a tende zonido di e promé bròmer si.
Ayera e akusado a bolbe splika mes un kos.
Tata di víktima tabata den sala di korte i a haña palabra pa bisa algun kos. El a bisa ku e yu tabata un bon yu pe i ta lamentá ku nunka e akusado a buska pa sa kon a para nan i no ta asumí su responsabilidat. Mas aleu el a bisa ku dia e víktima a muri su yu tabatin 2 luna. Te dia awe e komo tata ta bou di tratamentu sikiátriko pa motibu ku te ainda e no por pasa riba e loke e sosodé ku su yu. E tata a bisa ku e yu su hòbi tabata kore bròmer i nèt e dia ei, el a kaba di harm’é i pa promé bia a sali kuné pa kore, sin nunka a regresá kas. E akusado tabata awa na wowo ora ku e tata tabata na palabra. El a splika ku niun momento so tabata e intenshon pa el a kousa e aksidente. Segun e akusado e bia aki e kaso tabata mas duru ku nunka pe. Hues Carmelia a sugirí pa via “ slachtofferhulp” pa e famia papia ku otro i asina por desogá.
Abogado general a bisa ku e ta haña ku e víktima a kore outo di manera iresponsabel, dor di para su vehíkulo direpente mei mei di kaya, pone ku e bròmer a dal den dje ku e konsekuensia fatal.
Mirando tur esakinan fiskal a haña e akusashon probá i a demandá Walle na 100 ora di trabou pa komunidat, mas 1 aña inkondishonal sin reibeweis.
Aki 3 siman Hof lo dikta sentensia.