WILLEMSTAD- Doño di Borinquen Bar Restorant a haña 1000 florin di but pa motibu ku e no a tene su mes na reglanan stipulá relashoná ku e pandemia di Covid.
Francois (47) nase na Haiti mester a presentá den e promé kasonan yamá “ Covid zitting”.
Ta trata di siudadanonan ku a faya ku lei di orario riba kaya òf negoshi ku gobièrnu a stipulá.
Segun e akusashon e propetario tampoko a tene su mes na regla.
Dia 19 di desèmber 2020 e tim multidisiplinario a bai de Edison straat kaminda e bar ta situá. Ora nan a yega, nan a haña algun persona para na e sitio. E tim a sospechá ku tabatin bendementu i konsumo di alkohòl.
Mes ora nan a atendé ku e propietario pa motibu ku e orario a pasa i ainda tabatin hende na e bar miéntras no tabatin stul ku terasa pa e hendenan por sinta pafó.
E akusado a bisa e no ta mira motibu pa paga e but, paso e no tabata sa mes ku mester tabatin stul pa e klientenan sinta.
Tambe el a bisa ku no ta bèrdat ku tabatin hopi hende na su lugá. Tabatin solamente 2 persona wardando nan kuminda. Segun e akusado su lugá ta skibi na kámara di komèrsio komo restorant tambe i por a keda habrí te 8 or di anochi segun e reglanan di e tempu ei.
Fiskal a haña e akusashon probá i a hasi demanda di 1800 florin.
Fiskal bisa ku no tabatin mag di bende kos na e forma kon e akusado a hasié , pero solamente den forma di drive thru.
Pues e no a tene su mes na regla.
Hues den su desishon a haña e akusashon probá pero a desviá for di e demanda i kondená e akusado na 1000 florin.
Laga un komentario