WILLEMSTAD.- Ayera Djamars for di den oranan trempan di mainta e tim multidisiplinario formá pa MEO, BAB, departamento di inspekshon di Ministerio di Salubridat, Duana i Kuerpo Polisial di Kòrsou a hasi un bishita na Plasa Nobo na Punda.

Na nan yegada di un manera stratégiko mesora a sera tur entrada i ningun persona no por a drenta ni sali. Despues di algun ratu a kuminsá laga personanan sali pero esaki despues ku nan pasa kòntròl di parti di Kuerpo Polisial di Kòrsou. Tabata kontrolá tas i sakunan i tambe identifikashon i pèrmit.

Durante di e kòntròlnan ku a keda ehersé un biaha mas e tim multidisiplinario a kanta bingo despues ku a haña un kantidat grandi di remedi i supstansianan prohibí, remedinan toksiko i tambe remedinan ku a pasa nan fecha di vensementu. Total a konfiská un kantidat di 11.320 píldora prohibí ku mas tabata píldoranan kontra impotensia. E píldoranan konfiská tabata entre otro After Morning, Cialis, Viagra, Sex Energizer, Sex Booster, Powerspring, Ciprotol, Vigo, Duroval, Didoplex Forte, Tadifil, Loratadine, Amoxilina.

Tambe a deskubrí algun persona bendiendo bibidanan alkohóliko kual nan no tin e pèrmitnan pa hasi esaki. Tur loke a keda konfiská lo bai wòrdu destruí próksimamente.

Diferente di e hürdónan no tabata kontentu ku bishita di e tim multidisiplinario. Na 2 okashon tabatin konfrontashon pisa ku kasi a terminá den detenshon. I di Otrobanda tabatin algun hürdó ku a aploudí e kòntròl i a pidi pa sigui ku e kòntròl riba un base mas regular.

Awe lo reuní ku direktiva di Fundashon Marshe ku lo bai atendé ku e diferente hürdónan den Plasa nobo.