WILLEMSTAD – Un situashon sumamente lamentabel ketu bai ta tumando lugá na werf i ku mas ora pasa salu di kabainan ta kuminsá drenta zona di peliger. E kabainan ku a sali Aruba pa un kompetensia internashonal ta for di ayera mainta 9or ta den trailer pues ya mas ku 24 ora para riba nan pia den un trailer chikitu sera. For di yegada ayera di e barku na Kòrsou, doñonan di e kabai a enfrentá un problema serio i ‘red tape’ pa saka e kabainan ku a sali di Kòrsou bai Aruba pa e kompetensia. Ta trata aki manera EXTRA a informá kaba di 11 kabai.

Awe mainta hefe veterinario sr. Arnold Dwarkasing a bai werf, subi e barku i wak e kabainan I saka algun potrèt. Na su konsepto e kabainan tabata mustra bon para riba nan pia. Esnan ku a ekda pa kuida e kabainan a informe ku e kabainan no por kai drumi paso e espasio den e trailer ta chikitu. Dwarkasing a bisa bon kla ku e doñonan di kabai no por bin saka e kabainan te ora e kaba i regla tur kos. Via via a bin komprondé ku e intenshon ta pa e kabainan bai Parera. A komprondé ku na Parera tin 7 stal miéntras ku riba e barku tin 11 kabai. EXTRA a bin komprondé tambe ku for di momentu ku un kabai tin 10 ora den trailer esaki por tin konsekuensia pa salu di e bestia. Doñonan di e kabainan aktualmente ta tumando konseho di abogado i kontemplando un kaso den Korte.