WILLEMSTAD.- Fiskal Hato-Willems ayera a pidi 3 “vrijspraak” i a hasi demanda di 15 i dos bia 12 aña pa akusadonan den un kaso maratóniko di atrako ku a keda tratá ayera den sala di korte.
Ta trata di un kaso kual 10 persona ta keda akusá di a kometé un total di 20 atrako den bibiendanan rònt Kòrsou.
Pa ku e kasonan aki Ministerio Públiko ta akusá D. Henriquez (21), Gianfranco Curiel (19), Kevin Calle Ibanez Flores (19), Eldjehn Cicila (22), Marlon Pieters, Remich Martinus (25), I. Martis (19), Jeremy Martis (20), Etienne Wout (32), Jordy Eleonora (20) tantu kómplise komo esnan ku a kometé e atrako.
Nan tabata drenta kas di e personanan den oranan di mardugá tur na pretu bistí ora ku e víktimanan tabata drumí i sorprendé nan den kamber.
Mayoria di e víktimanan aki ta di edat avansá.
Nan tabata eksigí nan sèn òf oro bou di menasa ku arma di kandela.
Tur e akusadonan tabata presente ayera den sala di korte. Martinus, Eleonora e akusado femenino I. Martis su detenshon a keda suspendé anteriormente.
Martinus, Eleonora, Pieters, I. Martis, Wout, Martis, Ibanez Flores i Eleonora a ninga e akusashonnan kompletamente. Curiel ta e úniko ku a atmití su kulpa i a benta vários nòmber di esnan ku el a kometé atrako kuné.
Fiskal durante su rekisitorio a bisa ku no por prueba Martinus ni Eleonora di kometé e aktonan i ta pidi korte pa apsolvé nan di tur akusashon.
Pa loke ta trata Pieters, tambe fiskal a pidi pa deklará liber di tur akusashon mirando ku no por proba ku ta e a hòrta e kètsnan Chanel.
Pa loke ta trata Kevin, fiskal a bisa ku tin 17 akusashon den su kontra, pero Ministerio Públiko por proba solamente 6.
Tambe ta akus’é pa poseshon di arma di kandela. Mirando esaki fiskal a yega na un demanda di 12 aña pa e akusado.
Fiskal a demandá e akusado femenino I. Martis na 9 luna di kual 3 kondishonal pa inkubrimentu di kosnan hòrtá.
Pa loke ta trata Jeremy Martis, fiskal a pidi 15 aña i pa Wout 12 aña di kastigu.
Hues lo tuma desishon aki 3 siman.