WILLEMSTAD.- Ayera korte di promé instansia a bai di akuerdo ku e demanda di fiskal i a kondená Shadrach Dap na 12 aña di prizòn. Dap ta keda akusá di a hinka Roberto Jose Cathalina, nasé na Colombia dia 25 di yüni 1982 dos bia na altura di su garganta ku forsa ku un kuchú ku e konsekuensia fatal, despues di un diskushon.
E kaso a tuma lugá 4 di sèptèmber aña pasá na krusada Mampurituweg/ Kaya Juan A. Lesire.
Shadrach despues di su akto a drenta su outo bai, pero siguiente dia a bai entregá su mes na polis.
Shadrach semper a para riba defensa propio.
Polis a haña un “melding” di un bringamentu na e sitio ariba menshoná mei mei di kaya.
Ora ku e agentenan a yega, nan a mira un Toyota ku ainda tabatin su motor sendé ku a resultá di e víktima.
Mas aleu nan a tuma nota ku e víktima tabata drumí abou i tabatin hinká na su lomba. Testigunan a bisa ku nan a mira e hòmber a kore bai despues di su akto den un Toyota Paso.
Segun outopsia e víktima tabatin 2 hinká di kual un di nan a perforá su pulmon. Debí na pèrdida di sanger, el a fayesé.
Polis a bisa ku no a haña arma den outo i nada ku e víktima por a usa pa arma, manera e akusado ta pretendé.
Shadrach a konta ku e dia ei, el a sali pa bai traha i ora e tabata pará den lus di tráfiko, el a mira Roberto pasa. E hòmber a wak e i bira bin su tras dirèkt. Segun e akusado, Roberto a kore dal den su outo vários bia.
Despues Roberto a kore bin mas duru dal den su bùmper patras, despues blòki’é. Ei a surgi un konfrontashon den nan i el mira kon Roberto a kuminsá buska algu den su outo.
El a spanta i sintá den su outo el a kue Roberto choka. Roberto miéntras tantu a hasi manera e ta kue algu abou i ora el a tuma nota di esei, el a hink’é den su lomba, pasó e no tabata sa kiko Roberto tabata bai kue. Despues Roberto a logra lòs i sali di otro banda di porta pasahero. Ora ku Roberto a baha e tabatin un palu den su man, ku el a kue patras den e outo. Shadrach a bisa ku e na su turno a subi e dak di e vehíkulo i purba tene e palu ora Roberto tabata zuai e riba dje. Despues el a mira ku Roberto tabata tur na sanger, el a drenta su outo i kore bai.
Hues a revelá ku mama di Shadrach a deklará na polis ku na aprel, el a fia Roberto basta kuminda dia ku e tabatin trùk di pan, pero nunka e hòmber no a pag’é. Fo’i dje dia ei a surgi problema entre nan.
Despues Roberto a bin kas di Shadrach huntu ku un otro hòmber kual a surgi un diskushon i bringamentu entre nan.
Segun e mama, Shadrach fo’i dje dia ei, a keda hopi rabiá i a bisa ku e ta hinka e gainan ei mata.
Pa e motibu ei e akusado a bai fo’i kas di su mama i bai keda na kas di su tata, pa evitá problema.
Segun testigu, nan a mira Shadrach hinka mitar kurpa den outo di e víktima e dia ei. Despues ámbos a baha fo’i outo i a kuminsá bringa. Shadrach a kue un palu i zuai e den e direkshon di e víktima. Hues a duna di konosé ku polisnan a skibi den e prosèsverbal ku no tabatin sanger den outo di e víktima, p’esei nan ta kere ku e akusado a hinká e víktima na momento ku el a baha fo’i outo. Tampoko a haña arma den outo di e víktima. Dòkter a konstatá ku e víktima tabatin vários repchi kibrá. E akusado a bisa ku e tin hopi duele pa loke el a hasi i e manera kon e kosnan a bai. No tabata su intenshon pa mat’é.
Na 2006, Dap a keda kondená pa asesinato na Hulanda di mes un manera. Pero debí na su edat yòn e tempu ei, el a haña kastigu hubenil i a keda será te ku 2011.
Fiskal no ta haña ku tabatin aktuashon di defensa propio den e kaso aki i ta pensa ku e akusado a bai demasiado leu.
Hues den su desishon a bisa ku e akusado a kita bida di e víktima lagando su 5 yunan sin tata. Hues a tene na kuenta tambe ku e akusado despues di su akto no a para wak si e víktima tabatin mester di yudansa. El a drenta su outo i kore bai lag’é atras benta riba kaya. Mirando tur esakinan fiskal a haña e demanda na su lugá.