WILLEMSTAD.- Ayera Sentro di Detenshon i Korekshon Kòrsou a hasi entrega di diploma di SBO nivel 1 i 2 na 12 detenido ku a terminá e estudio di furadó i kosedó.

SDKK tin un departamento ku yama “Enseñansa/formashon i training” kaminda partisipantenan ku kier hasi un estudio por bin skol. E aña eskolar 2016-2017 e kurso di kosedó i furadó a keda duná riba nivel di SBO komo un grupo piloto.

E estudionan aki a wòrdu duná huntu ku Feffik ku ta e instansia rekonosé dor di departamento di ETE pa e partisipantenan por haña un diploma rekonosé.

Motivashon i esfuerso di e partisipantenan ta hopi importante si nan kier logra un diploma rekonosé. E gruponan a kuminsá ku 10 partisipante pa estudio di kosedó i 10 pa furadó. Pero pa finalisá e estudio a kaba 6 partisipante di kosedó i 6 partisipante pa furadó. Furadó a kaba riba nivel 2 i kosedó riba nivel 1.

E estudio tabatin parti di teoria i práktika. Tur partisipante di furadó i kosedó a traha hopi duru pa nan por a kaba nan estudio den 1 aña. Partisipantenan tantu di kosedó i furadó su konosementu a bira hopi grandi den e parti di práktika. Esaki por mira bèk riba tur loke e partisipantenan a traha durante aña.

E partisipantenan a haña tarea di e dosente/werkmeester ku ta bini ku stul i kanapé nan ku ta poné pa tira afó riba rònt Kòrsou. SDKK promé ta desinfektá e stulnan i despues trabou ta kuminsá pa desharmá, harma i drecha e stul pa despues por fura nan. Partisipantenan di kosementu ta mester bai kose, kòrta pa despues por kose. E partisipantenan mester a kose nan propio kamisa i karson.

E intenshon final ta pa e partisipantenan ku yega e fecha ku nan mester terminá nan estadia den SDKK por haña un trabou riba lokual ku nan a siña den nos komunidat. Ta enkurashá nan tambe pa e parti di enterpreneur i asina traha riba nan mes.

Meta prinsipal ta resosialisashon di e partisipantenan i esei ta e tarea di Sentro di Detenshon i Korekshon Kòrsou. Partisipantenan por haña un di dos chèns i huntu ku komunidat i tambe kompanianan SDKK por hasi esaki pa di bèrdat e chèns aki por wòrdu konkretisá.

Pa aña eskolar 2017-2018 segun plan lo bini ku estudio di kosedó, furadó, bouwkunde i Lassen pa mas detenido por haña oportunidat. Tambe e meta ta pa na final di kada estudio  e partisipante por haña un SBO diploma.

LAGA UN KOMENTARIO

Please enter your comment!
Please enter your name here