WILLEMSTAD.-Den un aviso Kuerpo Polisial di Kòrsou ta hasi un yamada na doñonan di outo pa tuma kontakto ku polis. Ta un total di 137 vehíkulo ku doñonan mester atendé ku polis. E doñonan di e vehíkulonan tin espasio di tempu for di 22 di yanüari último te 12 di febrüari próksimo. Por pasa na ofisina di polis na Rio Canario durante oranan di ofisina.

Tin algun marka di outo ku apénas tin un (1) vehíkulo so den e lista ei. Markanan manera Honda, Mercedes Benz, Nissan, Volkswagen, Mazda, Mitsubishi i Seat ta masha poko vehíkulo ta pareser riba e lista. Outonan di marka KIA ta esun ku mas tantu ta aparesé sigui pa Toyota i na di tres lugá Hyundai.

E lèter di plachi number por duna un indikashon si ta trata di un vehíkulo relativamente nobo òf no, ounke esei no ta e kaso tur momentu. Por a tuma nota ku algun vehíkulo ku plachi di number A i tambe vehíkulonan ku plachi number B. Doñonan di e vehíkulonan tin te 12 febrüari pa tuma kontakto ku polis.