Oumentu kontagio a kondusí ku medida kódigo oraño

WILLEMSTAD.-Minister Steven Martina enkargá ku Desaroyo Ekonómiko den un enkuentro ekstraordinario a dediká atenshon na e desishon ku a kai na Ulanda pa pone Kòrsou riba kódigo oraño, loke ta enserá ku ta deskonsehá e komunidat ulandes pa biaha pa Kòrsou.

Minister Martina a enfatisá ku Kòrsou ta keda habrí pa buelonan for di Ulanda pa tur esnan ku ke pasa e PCR-test, tur ta bon bini pasobra Kòrsou ta un pais sigur unda por pasa fakansi i bin bishita famia.

E notisia ku a drenta for di Ulanda no ta agradabel pa Kòrsou. Echo ta ku e tendensia ei tabata biba basta dia kaba, pero a logra want’é, pero awor si e situashon a kambia. E desishon aki tin konsekuensia serio pa Kòrsou, manera EXTRA a informá kaba for di den oranan di mainta pasobra pa kada turista ulandes oropeo ku bini Kòrsou na momentu ku nan bai bek nan mester bai karentena pa 10 dia. Esaki sigur lo tin su impakto riba sektor hotelero, restorant i otronan den horeca. Ya kaba diferente kanselashon a drenta, asina minister Martina a duna di konosé. Konsekuensia di esei ta ku lo tin ménos hende t hasi uso di hotèlnan, restorant i otronan.

Na opinion di e mandatario, ta importante pa komunidat realisá ku mester hasi tur loke ta posibel pa dominá Covid.  Dia 30 di novèmber a tuma algun medida ku e meta pa kontené Covid, sinembargo e kantidat di hendenan ku tur dia di nobo ta keda kontagiá ku e vírus ta oumentando. Ta e desaroyo ei a pone ku Ulanda a pone Kòrsou riba kódigo oraño. P’esei tur hende mester koperá, evitá aglomerashon i kumpli ku medidanan di higiena. Dia 14 próksimo lo tin evaluashon, ta e dia ei lo sa si Kòrsou ta pasa un Pasku den kas òf no.