WILLEMSTAD.- E akusado L. Statia (45) a presentá ayera den sala di korte, akusá pa poseshon di 140 gram di koka dia 7 di mei 2021.

Segun e akusashon, e dia ei e tabata bayendo Hulanda, ora ku duana a haña un “headphone”  ku tabata demasiado pisá den su maleta. Momento ku a disidí di habri e “headphone”,  e personal di duana a haña 2 saku di plèstik, ku tabata kontené kokaina na pasta.

El a bisa ku e mes kier a bai ku e droga  pa su propio uso pa 2 luna. Segun e akusado, esei ta pa evitá ku e ta kumpra droga ku supstansianan straño bruá den dje na Hulanda. El a bisa e kos ei a yega di pas’é kaba  i el a bira hopi malu.

Riba e pregunta di hues, kuantu sèn el a kumpra e droga, e akusado a bisa ku ta pòrnada el a hañ’é serka un amigu.

El a bisa ku e  tabata bayendo serka un frei ku e tin na Hulanda pa keiru.

Segun fiskal na 2012 i 2013, el a keda kondená pa poseshon di droga i mariwana. Apesar di esakinan, e ta konsiderá e akusado komo ‘first offender’, pa motibu ku ta trata di kastigunan hopi bieu.  Tambe fiskal a tene kuenta ku e droga tabata na pasta  i mester konsider’é komo 80 %. Mirando tur esakinan fiskal ta yega na un demanda di 6 luna, di kual 3 kondishonal.

E akusado a bisa den su último palabra ku e dia ei e tabata komiendo, wardando pa abordá, ora ku e mesun duana ku a detené na 2012, a aserk’é bis’é pa ban kuné i insistí pa kontrol’é.

Nan a skòmel den su ekipahe i no a haña nada. Despues nan a keda bis’é ku e mester tin algu i a kuminsá kibra su kosnan. Ta ora nan a kibra e ‘headphone’, nan a haña e paketenan di droga aden.

Hues na final a haña e akusashonnan probá i  bai di akuerdo ku e demanda di fiskal