WILLEMSTAD. - Dia 25 di aprel algu promé ku mardugá di e aña aki e hòmber yu di Kòrsou di 42 aña di edat Johnny Henriques a keda likidá, ora ku un hòmber a yega serka di e víktima i a lòs no ménos ku 5 tiru den su direkshon. Polisnan ku a yega huntu ku paramédikonan, no por a hasi nada pa Henriques.

For di e dia en kuestion a start un  investigashon masal den e bario, pa por solushoná e kaso, pero ayera a bira konosí ku ainda e investigashon no a kondusí na solushon. Esaki ta motibu ku Ministerio Públiko ku tin guia di e investigashon a pone un rekompensa di 15.000 euro pa e persona ku por duna e tep di oro i asina yuda den solushon di e asesinato.

Ministerio Públiko a bin ku e rekompensa, despues ku Kuerpo Investigativo a haña imágennan di video nobo di e asesinato.

Segun e video t’asina ku despues di e tiroteo, por mira un hòmber klaramente kore subi un baiskel  hui.

E asesino tin un postura delegá di mas o ménos 1.80 meter. E hòmber tabatin un vèst òf yas ku kapuchòn i un karson skur ku un kèts na su pia. Manera menshoná el a subi un baiskel ku tabata poné den un forma kla pa e hui.

Un di e misterionan rondó di e kaso di asesinato aki ta dikon a likidá Johnny.

E motibu eksakto dikon a asesiná Henriques ainda no ta muchu kla.

Henriques tabata move den vehíkulonan karu i tabata profilá komo un hende ku ta biba un bida di luho. Pero tur hende ku konosé Henriques, ta bisa meskos, esta ku e ta un hende trankil, bon manera i no ta mustra di ta metí ku nada robes, liber di e forma kon e ta bistí (luho) i su vehíkulonan ku e ta move aden. Tin menshon tambe ku e tabata un bon tata pa su yunan.

Ironia ta ku un luna promé ku a asesiná Johnny, esta na luna di mart 2020, ruman hòmber di Johnny Henriques a skapa un intento di asesinato riba su persona.

E dia ei e ruman tabata huntu ku otronan na den e sentro komersial  Crabbehof na Dordrecht, ora ku despues di e tiroteo, dos hòmber ta hui riba un skuter.

Polis ke sa si e dos tiroteonan aki tin relashon ku otro.

Polis lo mantené e fuentenan anónimo, esun ku tin e tep di ora tin 15.000 euro.