WILLEMSTAD.- Despues di a konosé un bahada drástiko te na apénas un kaso nobo, ayera komunidat di Kòrsou a bin konosé tòg 15 kaso nobo, di kual por lo ménos 3 ta kasonan importá. Esei di akuerdo ku informashonnan di e tim di krísis di COVID-19. Mester bisa ku e 15 kasonan nobo aki ta forma parti di e 151 kasonan aktivo ku a yega ayera. Tin 18 persona ku a sali for di isolashon. E situashon na CMC te ku ayera mainta a registrá 16 persona hospitalisá, di kual 5 den kuido intensivo. Un di e pashèntnan ei ta prosedente di Boneiru. E kantidat di hendenan ku a fayesé a keda na 173.