WILLEMSTAD.- E informe ofisial di gobièrnu pa loke ta trata kasonan di Corona vírus a Sali mas lat awe, kompará ku otro dianan. E informe ta indiká ku tin 15 kaso nobo pa awe djaweps 10 di sèptèmber. Di e kasonan aki 3 ta kasonan importá, esta tripulashon ku a yega Kòrsou. Nuebe otro kaso ta liga na kasonan eksistente i tres kaso no por identifiká nan fuente ainda.

E kantidat di hendenan ku a rekuperá ta kuater i ketu bai tin un persona interná den hospital CMC. Un bista riba e total di kasonan for di mart esei ta 131, di kua 75 ta aktivo i 55 a rekuperá. E rekomendashon ta keda pa tur hende hasi máksimo esfuerso pa kuida nan mes i nan próhimo. Tene distansia pasobra esei ta e mihó manera pa evitá ku ta pega ku e vírus.