WILLEMSTAD - Ministerio Públiko (OM) di Kòrsou a prosesá den aña 2016 un total di 15.176

Prosèsverbal (PV). Ta tratá di prosèsverbal skibi dor di funshonarionan di KPC

relashoná ku infrakshon den tráfiko. Ta tratá di un oumento di 1.839 (13.8 %)

kompará ku un aña anterior. Un total di 11.632 di e 15.176 PV a bai finalmente

Korte. Esei ta un oumento di 2.061 (17.7 %), di akuerdo ku sifranan emití dor

di OM. Konklushon ta ku a skibi mas prosèsverbal i ku e kalidat di

prosèsverbal a mehorá.

Na aña 2016 a konstatá un total di 19.398 echo kastigabel den tráfiko. Riba

puesto number 1 di e Top 10 ta prònk e infrakshon di kore outo sin faha di

seguridat. Na tur a skibi 3.974 but pa e infrakshon aki. Kore outo sin un

reibeweis bálido ta riba puesto 2 ku un total di 3.949 but. E lista ta sigui ku

kore sin papel di seguro bálido, esta 2.797. Kore sin ku a paga belasting di

outo ta 2.053, kore sin un karchi kùr bálido 1.909, fayonan tékniko 1.321, kore

outo ku telefòn na orea 647, kore dor di lus kòrá 452 i kore ku ekseso di

velosidat 120.

E total di 19.398 echo kastigabel den tráfiko ta un oumento di 2.522 (14.9%)

kompará ku 2015. Un análisis di e sifranan a konkluí ku tabata tin 271 persona

ku a risibí 2 but, 73 persona 3 but, 19 persona 4 but, 4 persona 5 but, 1 persona

6 but i asta 1 persona ku a risibí un total di 8 but. Den pasado a registrá dos

aksidente ku morto na unda e shofùr den ámbos kaso no tabata den poseshon

di un reibeweis. Ámbos a risibí but pa esaki. Un situashon ku meresé mas

atenshon, di akuerdo ku Ministerio Públiko.

OM, huntu ku KPC, a disidí ku den aña 2017 ta bai focus mas riba seguridat

den tráfiko.