WILLEMSTAD.- Relashoná ku trabounan hopi duru ku tin tumando lugá pa por alsa kalidat i funshonamentu di Kuerpo Polisial di Kòrsou, a pone sèn disponibel pa vehíkulonan nobo.

Minister di Hustisia Quincy Girigorie a konfirmá pa EXTRA ku a pone sèn pa asina por kuminsá e trayekto pa Kuerpo Polisial di Kòrsou por haña vehíkulonan polisial nobo. E trayekto aki ta un trayekto ku a kuminsá algun luna atras.

No ta algu deskonosí ku tin hopi vehíkulo para den garashi di polis sea daña òf di dal/kibra.

Minister di Hustisia Quincy Girigorie a indiká ku prinsipalmente e vehíkulonan ku Kuerpo a risibí kasi 5 aña atras a yega nan tempu pa keda remplasá. Tin vários ku ta di dal i daña en bèrdat, pero mirando ku ya nan ta basta bieu, lo bai sali hopi sèn pa drecha esaki nan kual lo no sali kumbiniente. Esei ta motibu pa kual a pone un montante disponibel pa kuminsá kana e kaminda pa Kuerpo por risibí vehíkulonan nobo.

Bosero di Kuerpo Polisial Imro Zwerwer a indiká ku a trayekto aki ya ta basta leu. Entretantu tur agensia di outo lokal a hasi nan presentashon na Kuerpo Polisial di Kòrsou a base di kriterionan ku nan a risibí pa ku e posibel vehíkulonan nobo.

Awor via di un destaho públiko lo saka e agensia “ganadó”.

Si tur kos kana segun plan, promé ku e temporada di fin di aña, Kuerpo Polisial di Kòrsou lo tin 15 CUV (Cross Utility Vehicle) kompletamente nobo.

Esaki ta un invershon importante ku a kosta alrededor di 1 mion florin inkluyendo tur loke e vehíkulonan mester keda ekipá ku n’e.