WILLEMSTAD.- Curaçao Medical Center ta informá di oumento kasonan di COVID den nan personal. For di momentu ku e pandemia di COVID-19 a kuminsá, te awe a registrá 36 kaso bou di e personal.

Miéntras kasonan di COVID-19 ta oumentá na Kòrsou, Curaçao Medical Center tambe a eksperensiá un oumento den kasonan bou di empleadonan di hòspital ku a tèst positivo. Na tur 36 miembro di personal a tèst positivo for di inisio di e pandemia, di kua awor 16 ta aktivo i 20 a rekuperá.

Di e miembronan di personal ku a resultá positivo, vários ta personal di den kuido ku ta traha den e departamento di COVID-19. Esnan ku a tèst positivo ta den isolashon na kas i no por bin traha tanten ku nan no a rekuperá.

Miéntras tantu a aktivá e tim di Merka pa duna asistensia den e departamento di COVID-19 i kaminda ta nesesario pa asina por sigui duna kuido na tur pashènt.

CMC ta enfatisá ku trahadónan di CMC i komunidat kompleto mester keda mantené nan mes na reglanan di higiena i distansiamentu sosial na trabou i pafó di trabou pa asina protehá nan mes i esnan rondó di nan.