WILLEMSTAD. - Ayera a planta mas ku 170 mil flor na e momentu pa rekordá esnan ku a pèrdè nan bida den e tragedia di buelo MH17. Na bordo tabatin e kurasoleño Kevin Jesurun. A tumba e buelo dia 17 di yüli 2014 den espasio aéreo di Ukrania. Segun e investigashonnan, un rakèt di fabrikashon ruso di e rebeldenan di e pais a tumba e avion sivil. Na bordo tabatin 298 pasahero inkluyendo 196 ulandes. Jesurun ku tabata konosí pa su viahenan pa diferente destinashon tabata un di e personanan na bordo.

Na tur a planta ayera na e Nationaal Monument MH17 den kareda di 170.714 bloembol. Ta trata di bloembolnan di e famia Chionodoxa (ku na ulandes ta yama sneeuwroem). Den e promé parti di aña e flornan aki lo krea un ambiente blou lila den e área di e monumento.

E flornan ta un donashon di diferente kompania ulandes ku a uni den e proyekto iBulb pa asina duna nan kontribushon pa demostrá nan solidaridat ku e víktimanan i ta duna un dimenshon èkstra na e monumento.

E Nationaal Monument MH17 ta un área di konmemorashon amplio kaminda a planta 298 palu di mata pa konmemorá e víktimanan. Awor aki a planta e flornan bou di e palunan. Esei a tuma lugá mashinalmente. Kaminda e mashinnan no por yega, boluntarionan uni den Amigunan di Monumento MH17, a planta e bloembol ku sobra ku man. A skohe pa e tipo di bloembol aki komo ku nan ta floria tur aña i ta apto pa e tereno den e área di e monumento.

E tragedia a kousa un shòk enorme den reino ulandes. Jesurun manera indiká tabata un personahe masha konosí na Kòrsou i hopi stimá pa su amigunan. Su morto den e tragedia a kousa un shòk na Kòrsou tambe. Na Kòrsou si no a hasi nada pa Jesurun te ku awe.