WILLEMSTAD.- Dia 14 di mart 2018 a tuma lugá un insidente ku arma riba Amandelweg, na unda polis N.I.V.M. a los tiru ku a kousa morto di e hòmber Heric Nicolaas Ricardo (1973). Relashoná ku e insidente aki a tuma lugá un investigashon penal. Ministerio Públiko a studia e resultado di esaki i a yega na e siguiente konklushon.

Na yegada na kas di su warda di mardugá e polis enkuestion a mira un outo hòrtá riba karetera públiko. E polis a disidí pa sigui e vehíkulo for di un distansia i a pidi vários biaha via pòrtofon pa asistensia.  Dado momento ámbos (e polis i loke despues a resultá Ricardo) a para riba kaya kontrali di otro. Ricardo a haña na vários okashon e òrdu di e polis pa drumi abou. Loke el a hasi tambe, pero na vários okashon a bolbe lanta riba pia. Tambe e polis a duna atvertensia ku e lo tira si Ricardo no stòp di lanta para bek riba pia. Direpente Ricardo a kuminsá kore bai. Durante e korementu Ricardo a wak patras i kue su ‘schoudertas’ ku dos man tene. E momentu ei polis N.M. a los bala. Tres (3) tiru a alkansá Ricardo. El a muri na e sitio debí na pèrdida di sanger.

Ministerio Públiko ta enfatisá ku ta teribel ku Ricardo a bin muri debí na e insidente aki. Spesífikamente pa e famia di e defuntu esaki a trese kuné hopi fèrdrit i inkredulidat (ongeloof) kuné. Na e otro banda a bira kla ku e polis en kuestion mes no tabata a ke e resultado aki. E polis ta hopi perturbá (aangeslagen) dor di morto di Ricardo.

Ministerio Públiko ta di opinion ku polis N.I.V.M. - nèt 3 luna den servisio di KPC - a aktua korektamente dor di pidi konstantemente pa asistensia durante e persiguishon i duna sentral su posishon. Tambe el a tuma konseho via portofon di sentral di polis i otro polisnan eksperensiá. Na momento ku e polis tabata kara kara ku Ricardo, ku na e momentu ei tabata kana den su direkshon i no a sigui su òrdunan, el a aktua korektamente dor di kue su arma di kandela i duna vários atvertensia. Na Kòrsou tin un kantidat alarmante di siudadano ku ta kana ku arma den ‘schoudertas’ similar ku esun di Ricardo. Den praktiká ta konosí ku arma di kandela regularmente ta ser wardá den tas similar na esun di Ricardo. Bou di tur e sirkunstansianan aki tabata hustifiká pa e polis a los tiru na momentu ku Ricardo a kue e ‘schoudertas’ tene ku ámbos man.

Ministerio Públiko sinembargo ta di opinion ku e polis a aktua desproporshonal dor di kore i los vários tiru. Ministerio Públiko ta sali for di e punto di bista ku e polis a akta asina debí na e preshon pisá ku tabata riba dje na e momentu ei, kreá pa e komportamentu di e propio Ricardo.

Ministerio Públiko ta realisá su mes ku trabou di polis riba kaya por ta hopi fèrfelu, esaki tambe debí na e kantidat grandi di arma di kandela riba kaya. Den situashonnan inpredisibel asina un polis tin ku tuma desishon denter di algun frakshon di sekònde. E polis en kuestion a trata na aktua konforme su konsenshi den un situashon ku pa e, tabata impredisibel i menasante. Ministerio Públiko. Bou di e sirkunstansianan aki, OM no ta haña ta oportuno pa persiguí e polis penalmente.

Ministerio Públiko a informá e abogado di polis i e famia di e defuntu di e desishon pa no persiguí penalmente. Dado kaso ku famia di defuntu no ta di akuerdo ku e desishon aki, nan por entregá un keho na Korte di Hustisia pa laga Hof husga e desishon.