WILLEMSTAD.- Awe korte di hustisia a dikta sentensia den  e kaso di atrako ku morto ku a tuma lugá na e minimarket Hua Jiant na Oude Caracasbaaiweg dia 9 di mei 2013. Despues di sinku aña i mei hustisia a kondena e dos atrakadónan pa nan echo.

Tabata un di e kasonan di atrako ku a shòk komunidat. E akusado Q.E.P a haña kastigu “bij verstek”, pasobra e ta profugo di lei. Korte a sentensia P. Na un kastigu di 18 aña di prizòn. E otro akusado S.F. si ta será den prizòn. Pa F. Korte a dikta un sentensia di 15 aña di prizòn. Mester bisa ku Ministerio Públiko a hasi un demanda di 18 aña di prizòn pa ámbos atrakadó, pues korte a dikta sentensia di P. Konforme loke OM a pidi miéntras ku e kastigu pa F. Si a baha un poko.

Tabatin petishon pa daño perhuisio di Nafl 16.700 florin pa famia di e defuntu sr.Wu, i esaki a keda otorgá pa wes. Esaki ta pa gastu di entiero, plaka ku a keda hòrtá i kompra di un brel nobo. Wes a ordená pa gobièrnu adelantá e plaka konforme e “schadevergoedingsmaatregel”. Mas detaye den próksimo edishon di EXTRA.