WILLEMSTAD.- Ministerio Públiko (OM) di Kòrsou a start, na inisio di 2018, ku un sistema mas intensivo di asina yamá ‘vrijevoeters’. Esaki ta personanan ku a risibí sentensiá pa un kastigu di prisòn den un kaso penal di un wes. E ehekushon di kastigunan di prisòn, medidanan di wes òf transakshonnan será dor di fiskal ta forma e piesa final di henter e kadena hudisial. Ministerio Públiko tin e deber legal di ehekutá tur kastigu penal. Esaki ta nifiká ku tur desishonnan penal ku ta enserá kondena di un wes mester wòrdu ehekutá dor di Ministerio Públiko anto esaki por ta solamente otro si e desishon di e wes ainda no ta kla pa wòrdu ehekutá. Por ehèmpel den kaso kaminda un persona a wòrdu kondená pero su kondena no ta irevokabel ainda òf si e poder di ehekushon duna na Ministerio Públiko a kaduká basa riba un instrukshon legal manera ora e persona kondená risibí grasia. 18 persona a mèldu pa kumpli ku nan kastigu na SDKK.

Ministerio Públiko no ta outorisá pa parsialmente ni kompletamente kanselá e ehekushon di un kondena di wes ku ta kla pa wòrdu ehekutá. E ta asina tambe ku den kuadro di aplikashon di lei ku hende mester kere den dje, ta sumamente importante ku e ehekushon di desishonnan di wes i tambe tur kondishon mará na libertat kondishonal wòrdu ehekutá lihé, di mes forma i tambe mas tantu posibel di un forma kontinuo. E ehekushon di desishonnan di wes ta tuma lugá riba òrdu di Ministerio Públiko basa riba artíkulo 605 di nos Kódigo di Prosedimentu Penal. Segun e sistema legal, un fiskal ta tuma un posishon krusial den e proseso aki. E ehekushon di desishonnan di wes ta un proseso kontinuo. Ta posibel ku un hende ta será, pero su kondena no ta irevokabel ainda. Tambe ta posibel ku un hende por ta kondená irevokablemente i tin ku sinta un kastigu pero ainda e no a wòrdu yamá pa mèldu boluntariamente. Ministerio Públiko ta purba di ehekutá un kastigu mesora ku e bira irevokabel.

E departamento di ehekushon di e sektor Ehekushon i Sosten (Executie en Ondersteuning) na Ministerio Públiko ta enkargá ku ehekushon di kastigunan di prisòn, but i indemnifikashon di daño (schadevergoeding). E departamento di ehekushon ta disidí ku un persona kondená dor di wes ta bini na vigor pa mèldu boluntario. Esun ku por mèldu boluntario pa sinta su kastigu ta un persona kondená na un kastigu ku ya a bira irevokabel. Ora e persona risibí e karta di OM e mester mèldu su mes riba e dia i fecha menshoná den e karta na Sentro di Detenshon i Korekshon Kòrsou (prisòn SDKK) pa e por sinta su kastigu. E aña aki 18 persona kondená a mèldu nan mes pa bai sinta nan kastigu na Sentro di Detenshon i Korekshon Kòrsou. Si e persona no mèldu su mes na SDKK riba e fecha i ora stipulá polis por bin buska e persona i ta hiba e persona SDKK pa sinta bo kastigu. Kastigunan duna aki por wòrdu ehekutá den tur pais di Reino Hulandes. Si bo emigrá bai otro pais ku no ta forma parti di Reino Hulandes esei no ta kanselá e kastigu ku bo tin di sinta. Ministerio Públiko por bai busk’e kaminda e ta.