WILLEMSTAD.- Korte di promé instansia ayera a trata kaso di infrakshon di tráfiko. Ta trata di algun kaso relashoná ku korementu di outo bou influensia di alkohòl.
E shofùr di 34 aña ta keda akusá di a kore outo fuma dia 26 di febrüari último.
El a splika ku e dia ei el a bai Mambo ku algun amigu i a bebe un kantidat di Brandy kombiná ku bibida di energia.
Dor ku e ta un hende ku no sa bebe, el a bira hopi fuma. Na kaminda pa kas el a topa ku polisnan tabata hiba kontròl riba alkohòl.
E tambe mester a someté su mes na kontròl di kual e mester a supla pa midi e kantidat alkohòl ku e tabatin na e momento ei den su sistema.
Ora ku el a supla, e aparato a midi 905 mikrogram ku ta mas di 220 manera lei ta permití ora ku e persona tin ku bai kore outo.
Mirando esaki polisnan a kita su reibeweis for di dje.
E shofùr ayera a aseptá ku bèrdat e tabata fuma.
El a bisa ku no ta su kustumber di bebe, pero e dia ei si el a bebe poko di mas.
El a pidi korte pa pordon’é i a supliká e tribunal pa dun’é su reibeweis bèk pa so fo’i dia polis a kita su reibeweis tur dia e ta kana na pia bai trabou.
Fiskal Niks den su rekisitorio a splika ku e dia ei, e mes tabata presente durante e kontròlnan, pa e por a haña un bista kon nos outomobilistanan ta komportá nan mes.
Segun fiskal basta hende e dia ei tabata bou di influensia di alkohòl tras di stür. Ministerio Públiko ta haña esaki un akto hopi iresponsabel pa motibu ku e shofùr por kousa aksidentenan serio ku konsekuensia fatal.
Mirando tur esakinan fiskal a yega na un demanda di 1800 florin pa e akusado mas 120 dia di kual 52 kondishonal.
E akusado a bisa ku e no por paga e montante ei, debí na su situashon finansiero.
Hues den su desishon a haña e akusashon probá i a bai di akuerdo ku e demanda di fiskal.
Tambe hues a tene kuenta ku e situashon finansiero di e akusado i bisa ku e por paga su but den término di 6 luna i por haña su reibeweis bèk.