...sr. Elbert Sambo di Tim di maneho di KPC...

WILLEMSTAD.- Kuerpo Polisial di Kòrsou (KPC) tambe a keda afektá pa e pandemia di COVID-19.
Ayera sr. Elbert Sambo di Tim di maneho di KPC a bisa ku meskos ku vários organisashon, COVID a hasi su entrada den kuerpo polisial. Den luna di ougùstùs tabatin e promé kaso di un trahadó ku a tèst positivo. Asina poulatinamente durante e siguiente lunanan, tabatin diferente kaso den kuerpo polisial.
A registrá for di ougùstùs te ku djárason 190 kaso di kual 131 ta kasonan ku a bai den karentena. Nan a tèst negativo, pero e motibu ku a bai den karentena ta pa motibu di koleganan ku a keda kontagiá, òf familiarnan ku a keda kontagiá via di famia òf trabou.
Tin 59 kaso ku a tèst positivo den kuerpo. Pues na tur a yega na 190.
Ayera djaweps 7 di yanüari, tin tres kolega mas ku a bai den karentena i asina ta hasi e total di kasonan di COVID den KPC na 193. Ainda tin di wak si e tres kasonan nobo di den karentena lo tèst positivo òf negativo.
Ora a tende ku tabatin 190 kaso, ta konkluí ku e esfuerso ku e otro koleganan mester a hasi den temporada aki pa kumpli kue tarea a bira mas pisa. Esaki tabata e impakto di COVID riba e kuerpo.