DEN HAAG/W’STAD.- Ayera a sali un notisia kaminda ku pa 1e di yanüari 2024, muchanan no por drenta den klas na skol ku telefòn. Skolnan ta haña te ku 1e di òktober e tempu pa buska un solushon kon nan ta regla esaki. Si esaki no logra, e ora ei lo bini ku un reglamentu nashonal pa ku uso di telefòn na skol. Esaki ta loke ku minister di enseñansa Robbert Dijkgraaf a indiká den un karta pa Tweede Kamer. Nos a haña ta bon pa para ketu riba e notisia aki, mirando ku esaki ta un problema ketu bai den skolnan na Kòrsou tambe. Smartphones si por keda usá si ta nesesario pa lès òf pa asuntunan médiko, kaminda por ehèmpel un alumno ta diabétis i mester kontrolá/midi su suku. Pa skolnan sekundario minister a hasi palabrashon ku ocho organisashon di interes. Klupnan di interes di skolnan básiko i enseñansa spesialisá lo papia ku otro mas despues,
Ta e intenshon pa e palabrashon drenta na vigor pa 1e yanüari 2024. Den yüni di 2023 minister Dijkgraaf lo evaluá e medida aki, i si mester bini mas medida i hasta si mester bini un prohibishon mará den lei. Un lei lo dura 2 pa tres aña pa e por keda trahá i bira ehekutabel.
Un investigashon hasí ta mustra ku ta maestronan i dosentenan ta haña ku ta un estorbo enorme pa traha pasobra e konsentrashon no tei i e prestashon pa siñamentu ta abou, ora muchanan usa telefòn den klas.
Skolnan i dosentenan pa hopi tempu a pidi pa bini ku medidanan pa uso di telefòn selular na skolnan. Riba e tema aki Tweede Kamer a debatí hopi riba dje.
Aki na Kòrsou e alumnonan por drenta ku telefòn den klas, pero e mester ta riba silensio den tas. E telefònnan por sali for di den tas, ora dosentenan ordená esaki. sinembargo tin biaha alumnonan ta faya i ta tuma medidanan kontra di nan.
Pues esaki lo ta un bon ehèmpel pa direktivanan di skolnan tuma aki na Kòrsou tambe.