Tambe el a keda akusá pa kómplise di atrako

WILLEMSTAD.- Korte di promé instansia a kondená e akusado femenino Jhus- Nhaylis Calorina (23) ayera na 2 aña, despues ku fiskal a pidi 4 aña p’e.

Calorina ta keda akusá pa kómplise di atrako huntu ku Janiero Kopra riba un dama ku tabata kana den oranan di anochi riba Schonegevelstraat, dia 19 di yüni aña pasá.

Tambe e ta keda akusá pa inkubrimentu di kos hòrtá.

Calorina tabata shofùr e dia ei i a bisa di a haña òrdu di Kopra pa para. Segun deklarashon di e akusado na polis, ora el a para, Kopra a baha bai riba e dama i ranka su tas. Siguiente dia Kopra a bend’é un telefòn pa 50 florin, ku a resultá di tabata di e dama víktima.

Calorina ta keda akusá tambe pa estafa i malversashon di 2 outo. Doño di United Car Rental a hasi denunsia na polis ku el a hür e akusado un outo marka Volkswagen Golf.

Despues el a bèl pidi pa alargá e dianan. E mester a pasa paga 300 florin, pero nunka a yega ni laga tende mas di dje. Despues di un par di dia, e doño di e kompania ta mira su outo para na Hilton Hotèl. El a blòk e  outo pa wak ken ta drenta e vehíkulo. A resultá di ta un dama ku e konosé. Ora el a puntr’é unda el a haña e outo, e dama a bis’é ku e i su kasá a kumpra e outo serka Calorina.

Un otro siudadano tambe a bira víktima ora ku el a mira un Kia Forte 2013 na benta riba “vraag en aanbod” pa 6500 florin.

El a tuma kontakto ku e persona i a bai top’é pa kumpra e outo. Despues di a laga su mekániko wak e vehíkulo, el a kumpr’é pa 4500 florin. Na momento ku e víktima a wak e dokumento di kùr, el a realisá ku e vehíkulo tabata riba nòmber di un otro kompania di hür outo. El a haña e kos straño i a bèl e kompania ku a bis’é ku niun ora so nan a bende outo. Ora nan a bai chék mas profundo, a resultá ku e outo a wòrdu di hür na Calorina.

Calorina a bisa ku niun kaminda su nòmber ta pará di a bende outo. Pues e no sa nada di outo.

Fiskal a haña tur e akusashonnan tur probá i a demand’é na 4 aña.

Hues den su desishon Calorina kulpabel i a konden’é na 2 aña di kastigu kitando e 1 aña ku e tin sintá.