Kaso basta emoshonal

WILLEMSTAD.- Hues Edelenbos ayera a sentensiá S. Cijntje-Adamus (63) na 2 mil florin di but kual 1500 kondishonal i 2 aña  kondishonal sin reibeweis den kaso tráfiko ku morto komo konsekuensia.

Ta trata di un aksidente ku a tuma lugá dia 25 yanüari 2020 dilanti Kim He minimarket na Dein.

Ministerio Públiko ta akusá S. Cijntje -Adamus di a kore outo un manera iresponsabel, mirando ku e tabatin geps na su pia.

E dia ei Kòrsou a konosé 2 morto den ménos di 48 ora.

Despues ku sentral di polis a haña e informashon, e  unidat polisial ku a yega na e sitio a kuminsá ku un investigashon preliminar.

A resultá ku e dama a kore yega pa stashoná su outo  dilanti e minimarket.

Pa un motibu òf otro na lugá di primi brek, su pia a resultá riba e pedal di gas.

Esei a pone ku e outo a bai dilanti i dal e víktima ku tabata sintá riba un stul trankil di dje riba e stupi dilanti di e  minimarket.

A konsekuensia di esaki, e hòmber a keda gravemente heridá.

Ambulans a transportá e víktima den situashon di preokupashon pa CMC.

Lamentablemente siguiente dia a drenta e informashon ku e hòmber Jose Antonio Farrell, nasé na Kòrsou 17 di aprel 1947, a fayesé a konsekuensia di e leshonnan ku el a risibí.

Farrell a bira e di dos morto pa 2020.

Ayera e señora ku a kousa e aksidente, a presentá den korte tabata den korte pa responsabilisá su mes  pa su akto.

E tabata huntu ku su yu ku tambe tabata den outo kuné momento ku e aksidente e tuma lugá.

Banda di esei, e 2 yunan di e defuntu tambe tabata presente den sala.

E kaso tabata hopi emoshonal kompañá ku basta lágrima tantu di e akusado u a yora henter e kaso, komo e yunan di e víktima.

Hues a bisa ku e ta tuma e akusado hopi na malu, pasó e dia ei tabata di dos bia ku e ta drenta tras di stür kore outo siendo e tabatin geps na su pia.

Segun e akusado ta su dos dede nan di pia tabata den tratamentu i p’esei e mester a bisti un tipo di geps ku no ta esun duru manera  normal.

El a splika ku e dia ei e tabata koriendo su outo ora ku el a kuminsá sinti batimentu di kurason.

Esei a pone ku el a disidí para na e minimarket pa e kumpra un bòter di awa pa bebe su remedi.

Segun e akusado e no sa na ki momento su pia a baha riba e pedal di gasolin ku tur e konsekuensianan ariba menshoná.

Hues a puntr’é dikon ora el a kuminsá sinti malu, e no a laga su yu kore pe. Korte a pidi pa su yu muhé para testigu, pero e yu a bisa ku e ta kompletamente troumatisá te ainda i no ta sinti ku e por papia nada.

Momento ku hues a puntra e akusado si e tin último palabra, el a drai su mes pa e yunan di e defuntu.

El a pidi nan sòri ku ora el a drenta e no a ni bisa nan bon tardi no pasó e no tabata ke, pero pasó e no tabatin kara pa enfrentá nan.

Ku awa na wowo el a keda pidi e yunan sòri i a bisa nan ku e sa ni maske kuantu bia e pidi nan sòri òf hasi ki ku ta,  nan tata no por bini bèk.

Mas aleu el a sigui bisa ku fo’i dia e aksidente a sosodé, e no ta su mes mas.

Kada bes e ta keda mira e víktima drumí abou i esei ta pone ku e no por funshoná normal mas.

Na e momentonan ei tantu e akusado komo e yunan di e víktima a kuminsá yora.

Pa loke ta trata daño perhuisio, e yunan di e víktima a bisa ku nan no a hasi petishon, pa motibu ku seguro a paga nan un montante.

Fiskal Niks a haña e akusashon probá i a hasi demanda di 2 mil florin di kual 1500, 2 aña sin reibeweis  i 3 aña di prueba.

Pues e akusado mester paga solamente 500 florin.

El a bisa ku su sitashon finansiero ta hodidu i no sa kon pa paga e but.

Mirando esaki fiskal a dun’é un término di 5 luna pa paga e but. Pues 100 florin pa luna.

Hues Edelenbos den su desishon a bai kompletamente di akuerdo ku e demanda di fiskal.