WILLEMSTAD.- Parlamentario Wimbert Hato a hasi pregunta relashoná ku dos rotònde ku mester bini den 2021 den área di Otrobanda.
Hato a indiká ku den e nota di finansa di ministerio di VVRP, tin presupuestá un proyekto ku lo kosta 4 mion 30 mil florin pa ponementu di dos rotònde na lusnan di tráfiko na altura di Corendon i tambe na e krusada di lusnan di tráfiko na Aqualectra riba Pater Euwensweg.
Den Otrobanda dos rotònde lo bini na 2021.
Hato tabata ke sa den ki periodo di 2021 e rotòndenan lo keda realisá.
Pues ta desaroyando den área di Otrobanda. E dos rotòndenan tin di bini. E famoso “gemaal” tambe pa atendé ku awa sushi manda na Klein Hofje.
Sr. Hato tabata ke sa si tin un plan ku ta bisa kua proyekto ta bai promé i ta sigui. E parlamentario a bisa ku e ta puntra esaki, pa ora di kaba di drecha e kamindanan, pa despues no mester bai kibra loke a drecha pa pasa pipa pa bai Klein Hofje. Hato a insistí pa mira e plan di desaroyo di Otrobanda.