WILLEMSTAD.- Korte di promé instansia ayera a trata vários kaso di infrakshon di tráfiko.
E loke ku a hala atenshon tabata ku tabatin 5 menor di edat ku mester a presentá ku nan mayornan pa tratamentu di nan kaso. Entre nan e hóben di fam Echinique di 17 aña ku ta keda akusá di tabata kore outo sin reibeweis.
E hóben a atmití ayera ku bèrdat e ta kore outo sin reibeweis.
El a bisa ku e dia ku polis a par’e, el a kue e outo di su mama sin e sa, pa bai wak su peiki.
Segun e hóben, e sa ku esei ta robes i ta na altura di e konsekuensianan si algu a sosodé.
Pero el a siña su lès i awor ta warda te ora e tin reibeweis pa kore outo.
Hues Snitker ku tabatin e kasonan na su enkargo, a bisa e hóben ku e tin ku komportá di awor en adelante den tráfiko i no bolbe bai tras di stür sin reibeweis.
Hues a bisé ku e por komprondé ku ora bo ta hóben, bo ta wak e posibilidat, pero bo no ta wak e konsekuensia tras di e aktonan. Hues a lamentá ku mayornan di e hóben no a presentá kuné.
Fiskal Girigoria-Hernandez durante su rekisitorio, a bisa e hóben ku e ta tum’e hopi na malu.
Fiskal a splik’e entre otro si e okashoná un aksidente i dal un persona hasié lam i e no tin reibeweis, e ta esun ku tin ku bai kuida e víktima pa restu di su bida.
Fiskal a haña e infrakshon legalmente i konvinsentemente probá i a hasi demanda di 200 florin di but (debí ku e hóben a bisa ku e ta traha), si e no page, e mester bai 4 dia será den prizòn. Segun fiskal, pa e hóben keda riba e bon kaminda, e ta haña ku e tin ku sinti loke el a hasi. P’esei el a hasi demanda tambe di 20 ora di trabou pa komunidat di kual 10 ora kondishonal mas guia di Reclassering i 1 aña di prueba.
Hues a puntra e hóben kiko e ta pensa di e demanda, el a bisa ku e ta hañ’e bon.
Mirando esakinan hues a bai kompletamente di akuerdo ku e demanda di fiskal